PCYDDS yn Croesawu’r Arglwydd Ustus Fraser ar gyfer Digwyddiad Siaradwr Proffil Uchel Cyntaf
Roedd yn anrhydedd i Brifysgol Cymru Y Drindod Dewi Sant (PCYDDS) groesawu’r Arglwydd Ustus Fraser i’w champws yng Nglannau Abertawe, lle rhoddodd sgwrs ysbrydoledig i fyfyrwyr am ei yrfa ddisglair yn y farnwriaeth.
Roedd ei ymweliad yn nodi’r cyntaf mewn cyfres newydd o ddigwyddiadau proffil uchel i siaradwyr a drefnwyd gan y Brifysgol gyda’r nod o roi mewnwelediadau amhrisiadwy i fyfyrwyr gan weithwyr cyfreithiol blaenllaw.
Dywedodd y Cyfarwyddwr Academaidd Dr Bronwen Williams JP MStJ: “Mae gwahodd yr Arglwydd Ustus Fraser i siarad â myfyrwyr y gyfraith a throseddeg yn gyfle amhrisiadwy i bontio’r bwlch rhwng theori gyfreithiol ac ymarfer barnwrol. Mae ei fewnwelediadau o’r fainc yn rhoi persbectif prin a dwys ar heriau esblygol cyfiawnder, moeseg, a rheolaeth y gyfraith gan gynnig dealltwriaeth ddyfnach i weithwyr cyfreithiol proffesiynol y dyfodol o’r cyfrifoldebau y byddant yn eu cynnal ryw ddydd.
“Mae ei ymweliad â’r Drindod Dewi Sant yn tanlinellu ymrwymiad y Brifysgol i roi mewnwelediad byd go iawn i fyfyrwyr gan ffigurau blaenllaw yn y maes cyfreithiol. Trwy fentrau fel ein cyfres siaradwyr, mae PCYDDS yn parhau i feithrin rhagoriaeth academaidd, datblygiad proffesiynol, a dealltwriaeth ddyfnach o’r gyfraith ar waith.”
Mae’r Arglwydd Ustus Fraser wedi cael gyrfa gyfreithiol eithriadol yn ymestyn dros dri degawd. Cafodd ei alw i’r Bar (y Deml Ganol) ym 1989, cymerodd Silk yn 2009, a chafodd ei benodi’n Farnwr Uchel Lys yn 2015, wedi’i neilltuo i Adran Mainc y Brenin. Mae ei brofiad helaeth yn cynnwys gwasanaethu fel:
• Barnwr â Gofal y Llys Technoleg ac Adeiladu (2017-2020)
• Barnwr y Llys Masnachol (2021-presennol)
• Cadeirydd Comisiwn y Gyfraith Cymru a Lloegr (ers Rhagfyr 2023)
Wedi’i addysgu yn Ysgol Ramadeg Harrogate yn Swydd Efrog, aeth yr Arglwydd Ustus Fraser ymlaen i astudio’r Gyfraith yng Nghaergrawnt, gan ennill ei radd israddedig (1986) ac ôl-raddedig LLM (1988). Mae ei arbenigedd yn rhychwantu systemau cyfreithiol y DU a rhyngwladol, gyda phrofiad fel cymrodeddwr o dan reolau ICC, DIAC, a HKIAC.
Yn ei rôl bresennol fel Cadeirydd Comisiwn y Gyfraith, mae’r Arglwydd Ustus Fraser yn arwain ymdrechion hollbwysig i ddiwygio’r gyfraith, gan sicrhau bod y system gyfreithiol yn parhau’n deg, yn fodern, yn syml ac yn gost-effeithiol.
Gwybodaeth Bellach
Rebecca Davies
Swyddog Gweithredol Cysylltiadau â’r Wasg a’r Cyfryngau
Cyfathrebu Corfforaethol a Chysylltiadau Cyhoeddus
E-bost: rebecca.davies@pcydds.ac.uk
ô:&Բ;07384&Բ;467071