Ҵý

Education

Y Dyniaethau yn Llambed: Ymchwil

Cefnogi Taith y Cwricwlwm i Gymru

Mae Prifysgol Cymru Y Drindod Dewi Sant, mewn partneriaeth â Phrifysgol Glasgow, yn cynnal Partneriaethau Cynllunio: Creu Dysgu ar gyfer Cymru. 

Mae’r prosiect tair blynedd, seiliedig ar dystiolaeth hwn wedi’i gynllunio i gefnogi ysgolion ac ymarferwyr wrth wireddu’n gydlynol y Cwricwlwm i Gymru (CiG) yn gwricwlwm sy’n cael ei arwain gan ddibenion ac yn canolbwyntio ar broses.Ein nod yw gweithio’n  gydweithredol â’r proffesiwn addysgu i wella dealltwriaeth ac arfer wrth gynllunio’r cwricwlwm, ei symud ymlaen a’i asesu.

Yr hyn a gynigir gan Bartneriaethau Cynllunio

Nod y prosiect hwn yw adeiladu gwybodaeth broffesiynol a chapasiti ar draws y system addysg yng Nghymru. Ein nodau craidd yw:

  • Cyd-adeiladu Gwybodaeth Broffesiynol: Gweithio ochr yn ochr ag ysgolion ac ymarferwyr i ddatblygu capasiti a dealltwriaeth a rennir o gynllunio cwricwlwm, dilyniant dysgu, a dulliau asesu sy’n alinio  â natur canolbwyntio ar broses y CiG.  
  • Datblygu ‘Eraill Gwybodus’: Grymuso ymarferwyr i ddod yn arweinwyr mewn datblygu cwricwlwm yn eu clystyrau eu hunain, gan feithrin model cynaliadwy o gefnogi cymheiriaid ac adeiladu capasiti ar draws y system.
  • Creu a Rhannu “Naratifau Ysgol”: Datblygu astudiaethau achos cyfoethog, neu ‘Naratifau Ysgol’, gan ddefnyddio amrywiaeth o gyfryngau. Bydd y rhain yn arddangos dulliau amrywiol ac effeithiol o gynllunio cwricwlwm, addysgu, asesu, a dilyniant yn ymarferol ar draws pob Maes Dysgu a Phrofiad, gan ddarparu mewnwelediadau gwerthfawr ar gyfer y proffesiwn yn ehangach.
  • Ffocws ar Flaenoriaethau Cwricwlwm Allweddol: Ymdrin ag agweddau hanfodol ar y CiG, gan gynnwys sgiliau cyfannol, sgiliau trawsgwricwlaidd, ac amrywiaeth, gan sicrhau bod y dysgu’n gyfoethog, ymatebol, a chynhwysol.

Ein Dull Ni: Cynllunio Cydweithredol a Dysgu Proffesiynol

Mae ‘Partneriaethau Cynllunio’ yn defnyddio model o adeiladu capasiti proffesiynol a strwythurwyd yn ofalus, wedi’i seilio ar ymchwil ac arfer cydweithredol. Bydd y prosiect yn datblygu dros gylchoedd o dair blynedd, gyda phob cylch yn ymgysylltu â grŵp newydd o ysgolion.

Ymhlith nodweddion allweddol ein dull, mae:

  • Timau Cynllunio Cwricwlwm (TCC): Ar y cychwyn, bydd ymarferwyr ysgolion sy’n cymryd rhan yn llunio TCC, gan weithio’n agos ag aelodau tîm y prosiect. Yn y timau hyn, bydd aelodau’r prosiect yn gweithredu fel ‘eraill gwybodus’, gan ddarparu arbenigedd ac arweiniad wrth i ymarferwyr ymgymryd  â chylchoedd o gynllunio cwricwlwm gyda’u dysgwyr.
  • Timau Cynllunio Athrawon (TCA): Yna, bydd ymarferwyr o’r TCC yn cael eu cefnogi i lunio TCA gyda chydweithwyr o’u hysgolion clwstwr. Yn y cyfnod hwn, daw’r cyfranogion cychwynnol yn ‘eraill gwybodus’, gan raeadru eu dysgu a chefnogi datblygiad y cwricwlwm yn ehangach.
  • Cylch o Ymgysylltu: Bydd pob cylch blwyddyn yn cynnwys: 
    • Ymgyfarwyddo ac ymgysylltu cychwynnol.
    • Gweithdai cynllunio cwricwlwm a digwyddiadau rhannu gwybodaeth wyneb yn wyneb.
    • Cymorth parhaus trwy ymweliadau ysgol, sesiynau gyda’r hwyr (ar-lein), ac arweiniad pwrpasol gan dîm y prosiect.
    • Cyd-gynllunio ymagweddau at waith clwstwr a chefnogaeth.
    • Cyfleoedd ar gyfer adfyfyrio proffesiynol a rhannu dysgu.

Yr hyn y gall Ysgolion ei ddisgwyl: Taith Gefnogol a Datblygiadol

Gall ysgolion sy’n ymuno â ‘Phartneriaethau Cynllunio’ ddisgwyl profiad cefnogol, cydweithredol sy’n eu cyfoethogi’n broffesiynol. 

Dyma enghraifft ddangosol o daith: 

Dechrau Arni (Cyn-ymgysylltu a Thymor 1)

  • Ymgysylltu Cychwynnol: Bydd aelodau o dîm y prosiect yn ymweld â’ch ysgol i ddeall eich gwaith presennol gyda’r CiG ac i drafod y prosiect.
  • Gweithdy Sylfaen: Bydd tîm eich ysgol (dau athro ac uwch arweinydd fel arfer) yn mynychu gweithdy wyneb yn wyneb i gyflwyno’r ymagwedd sy’n canolbwyntio ar broses at y CiG.
  • Trefniant Tîm Cynllunio’r Cwricwlwm (TCC): Bydd eich tîm yn llunio TCC gydag arweinwyr dynodedig o dîm y prosiect a fydd yn darparu cymorth parhaus.
  • Cymhwysiad Ymarferol: Bydd eich TCC yn ymgymryd â chylchoedd cynllunio cwricwlwm yn eich ysgol, gan gymhwyso’r hyn a ddysgwyd o’r newydd gyda’ch disgyblion, gyda chefnogaeth arweiniad ac adborth rheolaidd.

Ymestyn Eich Effaith (Tymor 2)

  • Adfyfyrio a Chynllunio: Bydd eich TCC yn adfyfyrio ar yr hyn a ddysgwyd ac yn cyd-adeiladu cynlluniau i gefnogi ysgolion clwstwr.
  • Trefniant y Tîm Cynllunio Athrawon (TCA): Bydd tîm eich ysgol yn symud ymlaen i arwain TCA, gan ddod yn ‘eraill gwybodus’ ar gyfer ymarferwyr o’ch ysgolion clwstwr.
  • Ymgysylltiad Clystyrau: Byddwch yn ymgysylltu â’ch ysgolion clwstwr, gan eu cyflwyno i’r prosiect a’r dull sy’n canolbwyntio ar broses.

Cyfnerthu Dysgu a Rhannu (Tymor 3 a Thu Hwnt)

  • Cefnogi Gweithrediad Clystyrau: Bydd eich TCA yn cefnogi ysgolion clwstwr wrth iddynt ymgymryd â’u cylchoedd cynllunio cwricwlwm eu hunain.
  • Rhannu yn y Grŵp Cyfan: Bydd holl gyfranogion y prosiect yn dod at ei gilydd i rannu profiadau, adfyfyrio ar yr hyn a ddysgwyd a thrafod cynaliadwyedd.
  • Cyfrannu at “Naratifau Ysgol”: Bydd taith eich ysgolion yn cyfrannu at ddatblygiad astudiaethau achos cyfoethog ar gyfer y proffesiwn ehangach.
  • Datblygiad Parhaus: Nod y prosiect yw ymgorffori newid cynaliadwy, gyda chyswllt dilynol i weld sut mae eich ysgol wedi parhau i ddatblygu ei harfer.

Wedi’i seilio ar Ymchwil a Chydweithrediad

Teaching

Mae’r prosiect hwn wedi’i adeiladu ar sail dystiolaeth gref, gan dynnu ar ymchwil cenedlaethol a rhyngwladol ar ddiwygio cwricwlwm a dysgu proffesiynol, gan gynnwys canfyddiadau Camau i’r Dyfodol cynt. 

Rydym yn ymrwymo i ddull cyd-adeiladol, gan weithio mewn partneriaeth ag ysgolion, ymarferwyr, Llywodraeth Cymru, Adnodd, a rhanddeiliaid addysgol allweddol eraill.