Y Drindod Dewi Sant yn cynnal Diwrnod Blasu'r Gyfraith, Troseddeg a Phlismona i Fyfyrwyr Coleg
Mae Prifysgol Cymru Y Drindod Dewi Sant (PCYDDS) wedi croesawu myfyrwyr o Goleg Sir Benfro a Choleg Sir Gâr i’w champws Glannau Abertawe ar gyfer diwrnod blasu Y Gyfraith, Troseddeg a Phlismona.
Roedd y digwyddiad yn cynnig profiad prifysgol ymdrochol i fyfyrwyr trwy amrywiaeth o weithgareddau, gan gynnwys ystafell ddihangfa pobl goll boblogaidd iawn a gynhaliwyd yn ystafell dechnoleg ymdrochol arloesol Y Drindod Dewi Sant. Aeth myfyrwyr hefyd i sesiwn y gyfraith ar ddynladdiad ac archwilio elfennau allweddol o’r system cyfiawnder troseddol, gan gael canfyddiad ar weithdrefnau’r heddlu megis stopio a chwilio, yn ogystal â’r fframwaith cyfreithiol sy’n llywodraethu sylweddau.
Wrth ganmol y digwyddiad, meddai Amanda Morgan, darlithydd Coleg Sir Gâr: “Mae’r diwrnod wedi rhoi cipolwg i fyfyrwyr ar y cyrsiau cyfreithiol, troseddeg a phlismona sydd ar gael yn y brifysgol i helpu myfyrwyr i wneud penderfyniadau gwybodus am eu dyfodol. Mae’n braf i fyfyrwyr gael blas ar fywyd prifysgol a chwrdd â’r tîm addysgu.”
Ychwanegodd Karle Williams, darlithydd o Goleg Sir Benfro: “Diwrnod diddorol, hwyliog a llawn gwybodaeth a ddarperir i’n dysgwyr, gan roi blas iddynt o’r brifysgol a rhai o’r cyfleusterau rhagorol sydd ar gael.”
Mynegodd y disgyblion eu brwdfrydedd am y diwrnod hefyd. Meddai Adam Roberts, o Goleg Sir Gâr: “Roedd yn ganfyddiad pleserus a chyffrous i beth allai’r brifysgol fod i mi yn y dyfodol. Fe wnes i fwynhau sesiwn y Gyfraith a sut roedd yr holl drafod yn gweithio.”
Ychwanegodd Mari Lemon, myfyrwraig o Goleg Sir Benfro: “Mae’r diwrnod blasu hwn yn y brifysgol wedi gwneud i mi ailfeddwl fy newisiadau. Mae wedi gwneud i mi feddwl y gallai prifysgol fod yn opsiwn i mi.”
Meddai Bronwen Williams, Cyfarwyddwr Academaidd y Gyfraith, Troseddeg a Phlismona: “Y dyddiau hyn, mae’n bwysig iawn arddangos yr hyn sydd gan yr ysgol i’w gynnig o ran rhaglenni’r Gyfraith, Troseddeg a Phlismona, a hefyd y brifysgol gyfan, gan gynnwys ei champws gwych ar Lannau Abertawe. Roedd y diwrnod wedi’i drefnu’n dda gan y tîm, a mwynhaodd y myfyrwyr y sesiwn yn ein hystafell dechnoleg ymdrochol newydd yn fawr. Mae digwyddiadau fel hyn yn enghraifft wych o’r berthynas agos sydd gan PCYDDS ag ysgolion a cholegau lleol. Edrychwn ymlaen at gynnal rhagor o ddiwrnodau blasu yn ystod y misoedd nesaf a gwahodd hyd yn oed mwy o fyfyrwyr i’r campws i brofi beth sydd gennym ni i’w gynnig. Hoffwn ddiolch i’r holl staff a gymerodd ran, yn ogystal â staff y colegau a ddaeth.”
Gwybodaeth Bellach
Rebecca Davies
Swyddog Gweithredol Cysylltiadau â’r Wasg a’r Cyfryngau
Cyfathrebu Corfforaethol a Chysylltiadau Cyhoeddus
E-bost: rebecca.davies@pcydds.ac.uk
ô:&Բ;07384&Բ;467071