���Ҵ�ý

Mae Prifysgol Cymru Y Drindod Dewi Sant (PCYDDS) yn falch o gyhoeddi bod Danielle Wheatland, a raddiodd yn ddiweddar o’r rhaglen BA Addysg a Gofal Blynyddoedd Cynnar ar gampws Caerfyrddin, wedi derbyn Gwobr Goffa Beca Mai. 

Cyflwynir y wobr fawreddog hon er cof am Beca Mai Richards, un o raddedigion annwyl o’r Drindod Dewi Sant a fu farw’n drasig mewn damwain ffordd yn 2022.

Cafodd Danielle, a raddiodd yr wythnos hon, ei chydnabod am ei pherfformiad academaidd rhagorol, ei hymroddiad proffesiynol, a’i gallu i oresgyn heriau personol trwy gydol ei hastudiaethau. Fel myfyriwr, dangosodd ragoriaeth, arweinyddiaeth, ac ymrwymiad diwyro i addysg blynyddoedd cynnar yn gyson.

Dywedodd y darlithydd Alison Rees-Edwards, a enwebodd Danielle ar gyfer y wobr:  “Mae Daneille wedi rhoi 100% i bob aseiniad yn ogystal â’i hymgysylltiad yn ystod y rhaglen. Adlewyrchir hyn yn ei chanlyniadau gradd cyffredinol. Mae ei sgiliau arwain wedi datblygu ac mae wedi bod yn bleser ei gweld yn cefnogi ei chyfoedion. Nid yw’n syndod iddi gael ei henwebu fel cynrychiolydd myfyrwyr i’w grŵp dros gyfnod ei hastudiaethau. Mae gwirfoddoli a gweithio, ochr yn ochr â’i hastudiaethau a magu teulu i gyd yn dyst i pam mae Danielle yn haeddu’r gydnabyddiaeth hon”.

Mae Danielle, o Gaerfyrddin, bob amser wedi bod yn angerddol am gefnogi datblygiad plant ifanc, ar ôl gweithio mewn lleoliadau blynyddoedd cynnar gyda phlant rhwng chwe mis a saith oed.   

“Mae gen i blant fy hun, sydd wedi dyfnhau fy niddordeb ymhellach yn sut mae plant yn tyfu, dysgu a phrofi’r byd”, meddai. “Dewisais y Drindod Dewi Sant oherwydd ei enw da cryf mewn addysg a’r amgylchedd dysgu cefnogol, cymunedol y mae’n ei gynnig. Roedd pwyslais y brifysgol ar ymarfer myfyriol, sy’n canolbwyntio ar y plentyn yn cyd-fynd â fy ngwerthoedd personol a phroffesiynol”.

Dewisodd y cwrs Blynyddoedd Cynnar i adeiladu ar ei phrofiad ymarferol gyda sylfaen academaidd gadarn.  Dywedodd: “Roedd gen i ddiddordeb arbennig mewn dysgu mwy am ddatblygiad plant, lles emosiynol, sut i gefnogi plant ag anghenion dysgu ychwanegol (ADY) ac ymarfer cynhwysol. Rhoddodd y cwrs gyfle i mi archwilio’r meysydd hyn yn fanwl, tra hefyd yn cefnogi fy nhwf personol fel ymarferydd a rhiant”.

Ei nod oedd cael dealltwriaeth ddyfnach o sut i gefnogi plant yn holistaidd yn eu datblygiad a’u lles fel y byddai’n dod yn weithiwr proffesiynol mwy hyderus a gwybodus, ac i agor cyfleoedd pellach i arbenigo mewn meysydd pwysig iddi fel llythrennedd emosiynol, cynhwysiant, ac iechyd meddwl. Mae hi’n credydu’r cwrs fel ei helpu i lunio ei huchelgais hir dymor o weithio mewn rôl sy’n cefnogi lles meddyliol ac emosiynol plant ar raddfa ehangach. 

Dywed bod llawer o uchafbwyntiau drwy gydol y cwrs ac yn arbennig mwynheodd y modiwlau a oedd yn canolbwyntio ar ddatblygiad emosiynol, Cwricwlwm Cymru, cynaliadwyedd mewn addysg, ac Anghenion Dysgu Ychwanegol (ADY). Roedd y modiwl ADY yn sefyll allan i oherwydd ei fod yn dyfnhau ei dealltwriaeth o sut i gefnogi dysgwyr amrywiol a’i helpu i ddod yn fwy cynhwysol ac empathig yn ei dull gweithredu.   

Cwblhaodd leoliadau gwaith mewn lleoliadau blynyddoedd cynnar, a roddodd brofiad gwerthfawr iddi yn y byd go iawn ac a helpodd i bontio theori ag ymarfer. Dywedodd: “Fe wnes i hefyd ganolbwyntio rhai o’m hymchwil a’m haseiniadau ar ddatblygiad emosiynol plant, cynhwysiant, ac anghenion dysgu ychwanegol, pynciau yr oeddwn i’n eu gweld yn hynod ddiddorol ac yn bwysig i’r maes. Roedd y gefnogaeth gan diwtoriaid yn wych, ac roeddwn i’n gwerthfawrogi sut cawsom ein hannog i fyfyrio’n feirniadol a theilwra ein hastudiaethau i feysydd yr oeddem yn angerddol amdanynt.” 

Un o’r heriau mwyaf i Danielle oedd cydbwyso ei hastudiaethau gyda bod yn fam a gweithio ar yr un pryd. Roedd rheoli dyddiadau cau, lleoliadau, a bywyd teuluol yn heriol. Roedd yna adegau pan oedd hi’n teimlo wedi’i llethu ond datblygodd sgiliau rheoli amser a threfnu cryf, ac roedd yn pwyso ar gefnogaeth tiwtoriaid, cyfoedion, a theulu pan oedd ei angen.  Canfu bod ymarfer myfyriol wedi’i helpu i ymdopi a chanolbwyntio ar ei nodau hirdymor.

Dywed Danielle: “Mae’r cwrs hwn yn cynnig profiad dysgu cyfoethog a chyflawn. Gall fod yn academaidd heriol ond mae’r darlithoedd y tu hwnt i gefnogol a byddant yn eich helpu pan fo angen, ac mae’n rhoi cyfle i chi fyfyrio’n ddwfn, meddwl yn feirniadol, a thyfu’n bersonol ac yn broffesiynol. P’un a ydych chi newydd ddechrau neu’n gweithio yn y maes, mae’n darparu’r offer a’r wybodaeth sydd eu hangen i gael effaith ystyrlon mewn addysg blynyddoedd cynnar.

“Mae’r cwrs hwn wedi fy helpu i dyfu mewn hyder, datblygu agwedd fwy myfyriol at fy ngwaith a bod yn rhiant, ac mae wedi rhoi sylfaen gadarn i mi symud ymlaen yn fy ngyrfa. Yn bersonol, mae wedi fy ngwneud yn fwy gwydn a hunan-ymwybodol, ac yn broffesiynol, mae wedi agor cyfleoedd pellach ar gyfer arbenigo.”

Mae Danielle wedi cael ei derbyn i astudio gradd Meistr mewn Iechyd Meddwl Plant a Phobl Ifanc i ddyfnhau ei dealltwriaeth a’i harbenigedd mewn maes y mae’n hynod angerddol amdano ac i gefnogi ei datblygiad proffesiynol parhaus tuag at yrfa sy’n cefnogi lles meddyliol ac emosiynol plant.

Gwybodaeth Bellach

Eleri Beynon

Pennaeth
Cyfathrebu Corfforaethol a Chysylltiadau Cyhoeddus     
E-bost: e.beynon@pcydds.ac.uk     
���ô��:&�Բ�����;01267&�Բ�����;676790