���Ҵ�ý

Gail Allen

Mae fy ngwaith yn tynnu sylw at effaith canfyddiadau wedi’u newid, gan ysgogi gwylwyr i archwilio eu canfyddiadau eu hunain a’u barn ganlyniadol ar sefyllfaoedd bob dydd. Gall y gair canfyddiad olygu llu o bethau. Gall canfyddiad o bersbectif ffotograffydd fod yn rhith gweledol o dri dimensiwn neu ganfyddiad y gwyliwr o ofod a phellter.  Gall canfyddiad seicolegydd fod o ganfod sefyllfa neu ddeall syniad o safbwynt arall. Mae’r darn hwn o’r enw ‘Really See’ yn ymdrechu i arddangos y cysyniad o ganfyddiad a sut y gellir ceisio safbwyntiau eraill.  Mae ein meddyliau yn prosesu a chategoreiddio gwybodaeth yn reddfol, sy’n atgyrch gwybyddol a elwir yn fwy cyffredin yn farn. Iechyd da i chi. 

Emily Birolini

Mae bywyd fel cynfas gwag - dewiswch y lliwiau rydych yn eu caru i beintio’ch breuddwydion! Mae bywyd yn llif – cysylltiad – egni. Mae rhai pethau’n meithrin ein golau mewnol; mae pethau eraill yn ein gwacau.  Wedi ein datgysylltu o’n greddfau a’n cyrff, rydym yn treulio gormod o amser yn ein pennau’n poeni am arian a llwyddiant – yn aml yn esgeuluso’r hyn rydym yn dyheu am ei gael.  Fel cerrig crwn mewn nant, mae ein gweithrediadau’n anfon crychdonnau annelwig allan i’r byd.  Nid ydym yn gallu eu gweld, ond mae eu heffaith yn real. Mae cerddoriaeth, symudiad ymwybodol a chelf yn cysylltu, gan ddefnyddio lliw i olrhain ymgorfforiad llawenydd neu emosiwn yn y foment bresennol. 

Sasha Buckley

Mae fy ngwaith yn ddarn naratif gyda ffocws ar ddynoliaeth a gorweithio, sydd wedi’u cynrychioli gan inc du wedi’i lunio gan ben ysgrifennu trochi.  Mae amherffeithrwydd dynol yn cael ei gynrychioli drwy smotiau a blotiau inc, yn ogystal â rhoi dyfnder i’r dyluniadau.  Mae themâu eraill yn cynnwys disodli dynoliaeth gan beiriannau - a gynrychiolir drwy luniadau glanach, mwy mecanyddol sydd wedi’u gwneud gyda brws a phennau ysgrifennu leinin mân.  Mae’r rhain yn cael eu llunio gyda phren mesur i adlewyrchu trachywiredd peiriannau; maent yn ymddangos yn berffaith, ond maent yn brin o ddyfnder.  Mae hyn yn creu cyferbyniad tawel rhwng yr arddulliau.  

Yn ogystal, mae’r gwaith yn archwilio euogrwydd diffyg gweithredu, yn eistedd ychydig o dan wyneb y stori. 

Daisy Cartwright

Mae’r gwaith hwn wedi dechrau gyda sgan 3D o wrthrych cyffredin - esgid - heb ei ddewis am ystyr, ond wedi’i datgymalu drwy broses ac arbrofi.   Daeth y syniad o deithiau i’r amlwg yn ddiweddarach fel sgil-gynnyrch o weithio gyda’r ffurf.  Arweiniodd archwilio deunyddiau at strwythurau newydd mewn dau a thri dimensiwn.  Nid yw’r esgid yn bodoli mwyach - mae wedi cael ei disodli gan ffurf newydd: cynhwysydd ar gyfer symudiad, cof a meddwl.  

Mae’r gwaith hwn yn adlewyrchu fy mhrofiad o synethsesia amser-gofod, cyflwr lle mae amser yn cael ei ganfod yn ofodol - er enghraifft, gall dyddiau neu fisoedd ymddangos fel siapiau neu lwybrau.  Mae’r gwaith yn symud rhwng y tu mewn a’r tu allan, y gorffennol a’r presennol, y corfforol a’r rhithiol.  Gall y darn fod yn berthnasol heddiw, efallai ni fydd yn berthnasol yfory, ond o bosibl y bydd yn berthnasol yn y dyfodol.

Kai Coles

Rwy’n cynhyrchu sain; yn amrywio o seinweddau sydd wedi’u dylunio i greu profiadau trochol i ddarnau melodig mwy soniarus.  Mae fy ngwaith yn archwilio sut y gall sain effeithio arnom yn emosiynol, seicolegol a hyd yn oed yn gorfforol. 

Nod y darn sain hwn yw ail-greu’r teimlad o fod yn y groth; gofod cynhesrwydd, rhythm a diogelwch.  Mae lleisiau ystumiedig a synau byd go iawn wedi’u trin - fel y cefnfor – ac yn cyflwyno ymdeimlad pell o’r byd y tu allan a glywir o’r tu mewn.  Y canlyniad yw gofod groth artiffisial, wedi’i lunio gan sain, cof a theimlad.  Mae’r gwaith yn adfyfyrio ar y newid o ddiogelwch llwyr i’r anhysbys, a phwysau emosiynol y rhwyg cyntaf hwnnw. 

Georgia Day

Rwy’n credu bod cyfalafiaeth a’r diwylliant defnyddwyr wedi creu cymdeithas sydd bellach wedi’u datgysylltu oddi wrth unrhyw ffordd ddilys o fyw.  Mae cymdeithas wedi dod yn berfformiad o werthoedd cyfeiliornus, heb ystyr dynol go iawn.  Beth yw hyn yn meithrin ynom ar lefel unigol?

Ymhlith y ffolineb hwn, rydym yn dod o hyd i bocedi o burdeb a llawenydd dilys a ddaw o’r tu fewn yn hytrach nag o’r tu allan.  Rhaid i ni gydnabod beth mae hyn yn ei olygu i bob un ohonynt er mwyn byw bywyd dilys. 

Drwy ddefnyddio collage wedi’i ysbrydoli gan arddull DIY y diwylliant ‘zine’ pync a’r defnydd o ‘détournement’ sydd wedi’i ysbrydoli gan y ‘Situationists’, rwyf wedi ail-gyd-destunoli deunydd a ddarganfuwyd drwy ei droshaenu gyda fy mhortreadau bychain fy hun sydd wedi cael eu ffilmio dros y 5 mlynedd diwethaf. 

Lila Lawes-Davies

Mae fy ngwaith yn archwilio effaith cyflyru cymdeithasol ar ddynion a merched. Drwy themâu fel iechyd meddwl a disgwyliadau pan ydych yn mynd ar ddêt, rwy’n ceisio tynnu sylw at faterion cyffredin dynion a merched wrth rymuso gwylwyr i herio disgwyliadau, rhagfarnau personol ac ymatebion ein hunain ac eraill. 

Nod y darn hwn yw mynd i’r afael â hunanfynegiant a hunaniaeth, agor dialogau sy’n cwestiynu lle mae ffiniau dilysrwydd a disgwyliadau cymdeithasol yn uno.

Jasmine Flores

Mae fy ngwaith yn adlewyrchu’r erydiad anfwriadol ond raddol o’m hunaniaeth ddiwylliannol wreiddiol.  Cefais fy ngeni yn Ynysoedd Philippines ac ar ôl byw yn Tsieina a Chymru, rwyf wedi fy llunio gan ddylanwadau amrywiol, gan wneud fy ymdeimlad o darddiad yn anoddach i’w ddiffinio.  Rwy’n defnyddio delweddau a motifau o brofiadau personol - megis y blodyn alaw’r dŵr a brethyn Tsieineaidd traddodiadol - gan eu gwyrdroi’n haniaethau wedi’u picseli.  

Mae’r gyfres hon yn adlewyrchu anhysbysrwydd llinell ffatri - mae pob print bron yn yr unfath ond eto wedi’u newid ychydig.  Fel inc sy’n pylu neu gof sy’n symud, mae’n adlewyrchu sut mae hunaniaeth yn trawsnewid yn dawel drwy ail-adrodd a threfn.

Ffion Green

Fel poblogaeth, rydym yn rhannu datgysylltiad o natur – bod yn gaeth i amserlenni prysur a gwaith.  Er mwyn goroesi, rydym yn treulio ein bywyd yn gweithio, gyda’r gweithle ei hun yn gweithredu fel rhwystr, gan gyfyngu ein hamser ymhlith natur.  Roeddwn yn meddwl am ba mor annaturiol yw hi i dreulio oriau y tu mewn i adeiladau oer, heb fywyd fel rhai ffatrïoedd.  Yn fy nyluniad, mae’r ffatri yn ymddangos yn blaen ac yn foel i adlewyrchu synnwyr o lyfnder emosiynol.  Mae’r gofod mewnol yn dychmygu lle y gallai gweithwyr hiraethu am fod – rhywle mwy meddal, mwy rhydd – gan gynnig cyferbyniad mwy hudolus â’r realiti y mae llawer o bobl yn ei wynebu mewn lleoliadau diwydiannol.

Megan Hitchmough

Mae’r themâu cysyniadol a archwiliwyd yn y gwaith hwn yn seicogoreograffi a chof.  Mae pob bloc yn gast o’r gofod negyddol o fewn ystafell – mae pob ystafell wedi’u clymu i atgof o le rwyf wedi treulio amser ynddo.  Mae’r hyn sydd fel arfer yn ofod gwag croesadwy wedi’i wneud yn solet mewn plaster, nad yw’n caniatáu unrhyw olau i fynd trwyddo.  

Mae’r solidedd hwn yn adlewyrchu presenoldeb corfforol y lle ei hun.  Tra bod plaster yn cynnal y strwythur, mae’r latecs yn dal y cof – gan adlewyrchu sut yr ydym yn llunio gofodau a sut maent yn ein llunio yn eu tro.  Mae ei briodwedd hylifol yn adlewyrchu natur symudol, ansefydlog y cof a’r profiad byw. 

Sian Jones

Rwy’n archwilio agweddau ar ein bywydau sy’n adlewyrchu, ac yn effeithio ar ein hunan mewnol.  I mi, mae clywed aflonyddwch yn cymysgu’r hyn rwy’n ei feddwl a’i glywed.  Rwyf wedi colli distawrwydd. Mae gwahaniaethau’n cael eu dileu a’u gorchuddio gan gwstard o sain wedi’i gynhyrchu. Mae fy ngwaith yn archwilio effaith y pethau hyn sy’n distewi, newid a chuddio ein canfyddiad a’n profiad o’r presennol ac am fod yn bresennol.  Mae’r realiti newydd hwn yn diffinio pethau’n wahanol. 

Fel estyniad, mae fy ngwaith yn ymchwilio i golled golwg trychinebus ac aflonyddwch gweledol.  Rwy’n gwneud hyn drwy greu fy fersiwn o brofiadau eraill. Rwy’n nodi pethau sy’n ymyrryd â’n sefyllfa bresennol, ac yn cwestiynu a yw’r pethau hyn yn ychwanegu neu’n tynnu oddi wrth ein bywydau.
 

Sori, beth ddwedaist ti?

Anwen Knox

Archwilio ymchwil a hawliau sy’n ymwneud â chrothau a’r ffordd y mae dynion wedi cael rheolaeth draddodiadol dros gyrff menywod. Ceisio cael gwared ar y fersiwn rhywioledig o organau atgenhedlu a’r stereoteipiau sy’n ymwneud â mamolaeth. Fel menyw, rwyf bob amser wedi teimlo dan bwysau ac wedi fy nghlymu i’m croth, fel petawn i’n rhoi genedigaeth cyn i mi fod yn ddynol. Mae fy nghelf yn caniatáu imi fynegi sut rwy’n teimlo’n fewnol mewn perthynas â’m horganau atgenhedlu a’m rhwystredigaethau personol gyda hawliau atgenhedlu, nid yn unig yn y gorffennol ond yn yr oes hon, ar draws y byd.

Manaf Karim

Rydw i wastad wedi bod â diddordeb mawr yn y ffordd mae ceir yn cael eu dylunio a’u hadeiladu. I mi, maen nhw’n cynrychioli symudiad a gwreiddioldeb, a ysbrydolodd fi i’w harchwilio’n fany- lach. Ar gyfer y prosiect hwn, cyfunais ddelweddau digidol â sain gyda phob rhan o’r prosiect yn cysylltu’n ôl â’m diddordeb mewn ceir—nid yn unig fel peiriannau, ond fel ffurfiau creadigol gyda’u cymeriad eu hunain.

Yasemin Koyuncu

Mae fy ngwaith yn archwilio effaith emosiynol a chorfforol gwaith llafur, yn enwedig yn y diwydiant gwasanaeth.  Gan ddefnyddio prosesau amlgyfrwng, dechreuais drwy gadw fy nodiadau archebu o’r bwyty lle rwy’n gweithio, gan gofnodi meddyliau a brasluniau rhwng tasgau.  Cafodd yr eiliadau hyn, sydd fel arfer wedi’u claddu o dan bwysau gwasanaeth cyson, eu trosglwyddo’n ddiweddarach, drwy luniadu, ar fyrddau wedi’u haenu â’r archebion gwreiddiol eu hunain. 

Mae’r gwaith wedi’i wreiddio yn y gorflinder sy’n adeiladu’n ddisylw dros amser ac yn gwahodd gwylwyr i gipio’r dirwedd emosiynol annelwig sydd yn aml y tu ôl i wasanaeth bob dydd, gan archwilio’r tensiwn rhwng gweithio am arian a gweithio fel artist.  Gydag ychydig o hiwmor, rwy’n nodi’r meddyliau preifat, heb eu hidlo, sydd fel arfer yn cael eu rhoi i’r neilltu yn y rhuthr i fodloni disgwyliadau. 

Abigail-Faye Macdonald

Mae’r gwaith hwn yn cynrychioli’r tro cyntaf i mi weithio gyda phypedau a chlai.   Rwyf fel arfer yn gweithio’n ddau ddimensiwn, yn fy llyfr braslunio. Roeddwn i eisiau archwilio symudiad a chefais fy ysbrydoli gan fioleg pobl ac anifeiliaid. Helpodd Fantastic Mr Fox (2009) (West Anderson) i lunio fy mhypedau, tra bod y set wedi’i dylanwadu gan Alice in Wonderland (2010) (Tim Burton). Dechreuais gyda braslun syml o lwynog a symudodd ymlaen i fodelu fy anifeiliaid anwes fy hun.  Gan ddechrau gyda cerameg clai sylfaenol, datblygais eu hwynebau, eu symudiadau, eu dillad, ac yn bwysicach fyth, eu cymeriadau unigryw.

Demi-Lee Myles

Mae’r darn hwn yn archwilio sut mae cyrff menywod yn cael eu trin fel cynnyrch ffatri; wedi’u creu, eu llunio, eu defnyddio a’u gwaredu.  Mae saith dilledyn gwyn yn cynrychioli camau allweddol mewn bywyd menyw, o enedigaeth hyd at henaint.  Dros amser, mae pob rhan yn dod yn fwy staeniog a threuliedig, gan adlewyrchu sut y mae cymdeithas yn rhywioli, rheoli ac yn dibrisio corff y fenyw dros amser.  Mae’r gair ffatri yn dod yn drosiad ar gyfer y systemau sy’n cynhyrchu disgwyliadau o fenywdod ar raddfa fawr.  Mae’r darn hwn yn cwestiynu pa mor gynnar ac mor ddwfn mae’r gwrthrycholiad yn dechrau a phryd os byth y mae’n dod i ben. 

Lisa Page

Rwy’n defnyddio’r broses gwneud ffilmiau i fynegi fy meddyliau, fy nheimladau a’m safbwyntiau.  Drwy arbrofi gyda golau, lliw, cyfansoddiad a sain, rwy’n dal y meddyliau sydd yn aml yn rasio drwy fy meddwl. Er mwyn deall y meddyliau hyn yn well, rwy’n defnyddio symbolau ac arwyddion i gynrychioli gwahanol emosiynau neu brofiadau, gan greu gwaith y gall eraill uniaethu ag ef.  Drwy ffilm, rwy’n trosglwyddo teimlad i ffurf, gan obeithio dod o hyd i atebion i fy nghwestiynau fy hun ar hyd y ffordd. 

Yn y darn hwn, rwy’n defnyddio technegau gwneud ffilm draddodiadol i adfyfyrio ar duedd YouTube o ‘Arferion Boreol’.  Drwy eu fframio drwy lens feirniadol, rwy’n archwilio eu hartiffisialrwydd, gan dynnu sylw at y pwysau i gydymffurfio a’r effaith y gall ei gael ar berson. 

Tommy Roberts

Mae’r darn animeiddio hwn yn adfyfyrio ar y ffyrdd y mae trawma yn effeithio ar ein taith drwy fywyd.  Mae wedi’i ysbrydoli gan y ffyrdd y mae ein meddwl ymwybodol yn ymateb i drawma a’i effeithiau dadfeilio.  Nid oes ganddo fawr ddim yn ymwneud ag atgofion – yn hytrach, mae’n ymwneud â sut mae profiadau trawmatig yn anhrefnu ein realiti ar ôl y digwyddiad.  Ar ôl profiadau o’r fath, mae’n rhaid i’n meddwl anymwybodol adfer ei hun i’w drefn naturiol.  

Cafodd yr animeiddio ei greu gan ddefnyddio’r peiriant ‘Source’. Mae’r feddalwedd hon yn hen ffasiwn, yn llawn bygiau ac yn drafferthus.  Mae’r cyfyngiadau hyn wedi’u cofleidio i roi cynrychiolaeth ddigidol o’r broses o wella ar ôl trawma.  

Birtukan Shugi

Dechreuodd y prosiect olaf hwn gyda’r ymdrech i greu dilledyn, gyda’r prif nod o archwilio lliw, gwaith crosio a brethyn.  Dechreuais drwy greu patrwm clytwaith syml gyda’r elfennau hyn, gan gysylltu gwaith crosio â lliw, sydd wedi’u gwneud o amrywiaeth o ddeunyddiau.  

Fe’i creais fel hyn i gyfuno elfennau mewn ffordd organig, heb batrwm strwythuredig. Rwyf wedi cael fy nylanwadu gan waith dylunio Zoe Paul, Amy Twigger Holroyd a Laura Schitger, gan ddod ag elfennau amrywiol ynghyd yn fy ffrog fy hun.  

Mewn gwrthwynebiad i ddillad sydd wedi’u gweithgynhyrchu’n helaeth, mae diddordeb gennyf mewn prosesau wedi’u gwneud â llaw.  

Tenebeyu Slase

Mae’r gwaith hwn wedi’i ysbrydoli gan Clamshell Dress (2001) y dylunydd ffasiwn Alexander McQueen. Roedd diddordeb penodol gennyf yn y ffordd y cafodd y dilledyn ei adeiladu a’i lunio gan ddefnyddio cregyn bylchog fel deunydd prin a bregus sydd hefyd yn cyfathrebu cryfder a benyweidd-dra. 

Defnyddiais yr enghraifft hon fel man cychwyn i ddatblygu fy nghysyniad fy hun.  Defnyddiais bapur gan ei fod yn ddeunydd hygyrch, niwtral a hawdd i’w dorri, ei drin a’i ailadrodd.  Rhoddais ddarnau wedi’u torri o siapiau hirgrwn hirgul (wedi’u seilio’n fras ar siâp y cregyn gleision) at ei gilydd, yna datblygais y rhain yn ddyluniad ar y model.  Yn y dyfodol, mae diddordeb gennyf mewn datblygu fy sgiliau torri patrymau, drwy ffasiwn gynaliadwy a dulliau tecstil.

Quinn Skinner

Mae rhywedd yn adeiladwaith cymdeithasol, templed ffatri sydd wedi’i wreiddio mewn casineb at fenywod a stereoteipiau.  

Rwyf wedi defnyddio cysur cyfarwydd teganau moethus, i ail-gydestunoli, herio ac archwilio hyn, gan droelli a gwyrdroi’r cysyniad hwn o rywedd, i fynegi hylifedd, a herio stereoteipiau drwy gerflunwaith tecstilau.  

Mae’r llwynog di-ryw yn fynegiant o fy nheimlad fy hun o byth yn ffitio i’r naill flwch na’r llall.  

Mae’r gwaith wedi’i ysbrydoli gan yr artistiaid Le fil a Leigh Bowery sy’n herio cysyniadau rhywedd.  Yn ogystal, mae’r gwaith Eviscerated Corpse (1984) gan yr artist Mike Kelley, ynghyd â gweithiau celf o anifeiliaid wedi’u stwffio wedi bod yn ddylanwad mawr arnaf.  

Joseph Thompson

Mae fy ngwaith yn archwilio haniaethu a darnio’r ffurf ddynol i fynegi teimladau o anfodlonrwydd ac ofn dirfodol y gall person ei deimlo wrth ystyried ei rôl a’i werth o fewn pa bynnag system neu gymdeithas y mae’n perthyn iddi. Rwy’n defnyddio fy nghorff fy hun fel sylfaen - yr un newidyn sy’n cynrychioli fy hunaniaeth yn ddiamwys - i greu darnau aml-gyfrwng haenog.  Mae printiau sy’n deillio o fy nghorff yn darparu cofnod diduedd, tra bod lluniadau a marciau drostynt yn adlewyrchu ymatebion emosiynol i ansefydlogrwydd bywyd modern.  Mae’r penderfyniad i hebgor yr wyneb yn fwriadol; mae anhysbysrwydd yn darparu perthnasedd ac yn gwahodd gwylwyr i gyfleu eu teimladau eu hunain.  Mae’r gwaith hwn yn fynegiant cignoeth o ddicter tuag at y diffyg pŵer y mae gan yr unigolyn mewn cymdeithas, dicter sy’n gyffredinol ond eto’n guddiedig. 

Sioned Thomas

Mae gan y prosiect hwn ystyr personol ac amgylcheddol.  Yn ddiweddar, collodd fy nheulu ffrind agos a phenderfynais ei anrhydeddu a’i gofio drwy greu ei hoff aderyn, Cwetsal y Gogledd, aderyn disglair a hardd a adlewyrchodd ei hapusrwydd a’i ddeallusrwydd.  

Mae’r ail aderyn er cof am fy Nhaid, a fu farw tua 2 flynedd yn ôl, ac mae ei ysbryd rwy’n ei weld yn y Barcudiaid Coch sy’n hedfan o gwmpas Cymru.  Mae’r cysgodion ar y waliau’n adleisio eu bywydau a’r rhyddid sydd gan y ddau nawr Yn ogystal, creais y Barcud Coch gan ddefnyddio plastig yn bennaf er mwyn cynrychioli’r niwed i anifeiliaid o ganlyniad i lygredd plastig.

Tallulah Timm

Mae’r portread hwn yn defnyddio CMYK (proses argraffu analog sy’n caniatáu printiau mwy a rhatach) drwy anfon delwedd drwy hidlydd digidol cyn ei dychwelyd i analog drwy beintio pob cylch â llaw.  Mae’r pwnc yn y llun yn gwisgo masg y ‘Creeper’: cymeriad o’r gêm Minecraft. Yn union fel y mae’r masg ‘Creeper’ yn dod â chymeriad digidol i’r byd corfforol, mae’r broses peintio â llaw yn dod â delwedd ddigidol i ffurf gorfforol.  Tra bod y byd digidol yn caniatáu i bobl gysylltu a rhyngweithio drwy chwarae gemau, mae hefyd yn creu datgysylltiad rhwng y defnyddiwr a’r byd corfforol.  Mae’r gwaith hwn yn archwilio’r tensiwn rhwng cysylltu a datgysylltu, corfforol a digidol, gan adfyfyrio ar sut yr ydym yn llywio perthnasau mewn byd sy’n seiliedig yn gynyddol ar sgriniau. 

Natalia Wilczynska

Mae’r prosiect hwn yn archwilio’r cysyniad o ffatri - nid fel safle ffisegol, ond fel adeiladwaith metaffisegol o fewn ein meddyliau. Mae’r gwaith yn archwilio’r ymennydd fel peiriant seicolegol lle mae cynhyrchu màs meddyliau yn gyrru profiad dynol. Mae delweddaeth du a gwyn yn tynnu sylw i ffwrdd, gan leihau’r byd i adeiladwaith a ffurf. Mae’n tynnu sylw at weithrediadau tawel systemau mewnol - cyfalafiaeth, cynhyrchiant, trefn arferol - sy’n llunio ein meddyliau a’n hymddygiadau. Nid dim ond trosiad am y meddwl yw “Ffatri”, mae’n adlewyr- chiad ar ganlyniadau seicolegol byw mewn diwylliant sy’n mesur gwerth gydag allbwn.

Laila Woodward

Drwy gydol y radd Sylfaen, rwyf wedi archwilio fy nghariad o serameg ac wedi defnyddio’r angerdd hwn yn y darn terfynol.  Mae fy ngwaith yn cyfuno peintio haniaethol, swrrealaidd gyda serameg egnïol, gan gysylltu ymchwil amgylcheddol gyda mynegiant creadigol.  Mae’r darn hwn yn canolbwyntio ar fywyd morol - yn enwedig organebau bach fel gwyddau môr - ac yn archwilio sut y gallem greu celf yn gynaliadwy.  Rwy’n cael fy ysbrydoli gan weadau a rhythmau’r cefnfor, a gan liwiau naturiol o’r byd o’n cwmpas.  Fy nod yw mynegi brys a harddwch newid ecolegol; i ddyfnhau fy arfer celf gynaliadwy drwy ddefnyddio deunyddiau sydd ag effaith isel ac archwilio sut y gall addasu adnoddau organig i leihau niwed amgylcheddol.