���Ҵ�ý

Yn ddiweddar, cynhaliodd Prifysgol Cymru Y Drindod Dewi Sant gynulliad deuddydd anhygoel a ddaeth â rhai o leisiau mwyaf meddylgar y byd ynghyd ym maes cynaliadwyedd, adeiladu heddwch a deialog pontio’r cenedlaethau.

Wedi’i drefnu gan Swyddfa Rhaglen Ryngwladol UNESCO-MOST BRIDGES (IPO) yn PCYDDS, cynhaliwyd y diwrnod o’r enw Bridging Futures: Connecting Today’s Decisions to Tomorrow’s Needs yng Nghanolfan Dylan Thomas yn Abertawe ar 16 Gorffennaf 2025. Croesawodd y digwyddiad gynulleidfa amrywiol o wneuthurwyr polisi, arweinwyr ifanc, cynrychiolwyr brodorol, addysgwyr, ac aelodau o’r cyhoedd.

Wrth wraidd y rhaglen roedd darlith hynod deimladwy a chanmoladwy gan Lysgennad Ewyllys Da UNESCO Phan Thị Kim Phúc. Yn adnabyddus yn rhyngwladol fel y ‘Napalm Girl’ o’r ffotograff o Ryfel Fietnam sydd wedi ennill Gwobr Pulitzer, mae Kim ers hynny wedi dod yn eiriolwr pwerus dros heddwch, cymodi a maddeuant. Gadawodd ei phrif anerchiad argraff barhaol ar bawb a fynychodd, gan blethu ei stori bersonol â galwad ehangach am dosturi a chyfrifoldeb byd-eang a rennir. Fe’i cyflwynwyd gan Is-Ganghellor PCYDDS, yr Athro Elwen Evans CB, a estynnodd groeso taer a chynnes, gan adfyfyrio ar effaith fyd-eang Kim ac arwyddocâd ei neges yn y byd sydd ohoni.

“Mae heddwch yn dechrau gyda thosturi tuag atom ein hunain, ein gilydd, a’r blaned,” meddai Phan Thị Kim Phúc, gan adfyfyrio ar ei hamser yn Abertawe. “Fe wnes i rannu nid yn unig fy stori, ond neges y gellir trawsnewid poen yn bwrpas, ac y gallwn gyda’n gilydd, adeiladu dyfodol mwy cyfiawn a heddychlon.”

Agorodd y digwyddiad gyda diwrnod i’r cyhoedd, yn gyfoeth o greadigrwydd a chysylltu. O weithdai deinamig a dangosiadau ffilm i ddeialogau bywiog yn pontio’r cenedlaethau, roedd ysbryd o gydweithio yn amlwg drwyddo draw. Cafwyd cyfraniadau ystyrlon gan gymunedau ledled y byd, gan gynnwys neges deimladwy gan bobl frodorol Kogi, Colombia. Roedd yr Anerchiad Diwylliannol a Ddefod hon, a draddodwyd gan Lysgennad Kogi, Jose Manuel Sauna Mamatacan, gyda’r cyfieithydd Paula Rodriguez, yn fynegiant pwerus o wybodaeth hynafol a chyfrifoldeb ecolegol.

Gwnaeth y digwyddiad ddyfnhau sgyrsiau trwy gyfres o fyrddau crwn lefel uchel a sesiynau strategaeth. Archwiliodd y cynrychiolwyr sut i ymgorffori meddwl hirdymor mewn polisi ac arfer, gyda mewnwelediadau gan arweinwyr byd-eang fel Gustavo Merino (UNESCO), yr Athro Peter Schlosser (Prifysgol Talaith Arizona), a Chomisiynydd Cenedlaethau’r Dyfodol Cymru, Derek Walker. Roedd y sesiynau hyn yn adlewyrchu ymrwymiad a rennir i weithredu ymarferol, gobeithiol yn wyneb heriau byd-eang. Canolbwyntiodd y sgwrs hamddenol rhwng Derek Walker a Gustavo Merino, Cyfarwyddwr Polisi Cymdeithasol yn UNESCO, ar oblygiadau polisi hinsawdd yn y byd go iawn, wedi’i seilio ar ganfyddiadau adroddiad diweddaraf UNESCO.

Ennyd arall cofiadwy o raglen Cynulliad Cyffredinol BRIDGES oedd y brif araith Building Bridges to Better Futures, a draddodwyd gan Jane Davidson, cyn Weinidog Cymru dros yr Amgylchedd a Chynaliadwyedd a chyn Bro Is-Ganghellor PCYDDS. Yn un o brif benseiri Deddf Llesiant Cenedlaethau’r Dyfodol (Cymru) 2015, cynigiodd Davidson sgwrs weledigaethol yn canolbwyntio ar gysylltiad, dychymyg a newid systemau. Anogodd ei sylwadau i gyfranogwyr feddwl yn feiddgar am y strwythurau sy’n siapio ein byd, a’r angen brys i adeiladu polisi sydd wedi’i wreiddio mewn lles hirdymor. Fe’i cyflwynwyd gan Derek Walker, Comisiynydd Cenedlaethau’r Dyfodol Cymru, a siaradodd am ei hetifeddiaeth a’i heffaith barhaol ar bolisi Cymru a byd-eang.

Roedd mynegiant creadigol hefyd yn chwarae rhan ganolog drwyddi draw. Rhannwyd cyfres o ffilmiau i archwilio ffyrdd amgen o feddwl am y dyfodol, ac i ennyn diddordeb cyfranogwyr yn emosiynol yn ogystal â deallusol. Anogodd Gweithdy Futures, dan arweiniad Petranka Malcheva o Swyddfa Cenedlaethau’r Dyfodol, adfyfyrio ar sut rydym yn adeiladu pontydd rhwng y gorffennol, y presennol a’r dyfodol, a sut y gallwn ddod yn hynafiaid da i genedlaethau i ddod. Agorodd sesiwn ysbrydoledig arall, “Mae hawl gan bawb…”, a gyflwynwyd gan Amgueddfa Cymru, sgyrsiau cyfoethog ar berthyn a sut y gall deall ein gorffennol helpu i lunio dyfodol gwell, mwy cynhwysol.

Roedd llawer o drafodaethau yn canolbwyntio ar gyd-greu rhwng cenedlaethau – y syniad bod doethineb ac arloesedd ar eu mwyaf pwerus pan fyddant yn cael eu rhannu ar draws oedran, cefndir a disgyblaeth. Daeth un sesiwn o’r fath, Intergenerational Conversation: Storying our Futures, â lleisiau amrywiol ynghyd i archwilio sut mae’r straeon rydyn ni’n eu hadrodd yn siapio’r dyfodol rydyn ni’n ei ddychmygu a’i adeiladu. Canolbwyntiodd ar ddarganfod sut y gallai adrodd straeon a rennir ar draws cenedlaethau ysbrydoli llwybrau ymlaen mwy moesegol, cynhwysol a chynaliadwy.

Cymerodd mynychwyr ran hefyd mewn arddangosfeydd a pherfformiadau rhyngweithiol a oedd yn tynnu sylw at sut mae pobl ifanc yn arwain y ffordd o ran cynaliadwyedd, adrodd straeon, a newid cymdeithasol. Soniodd y cyfranogwyr am ymdeimlad gwirioneddol o egni ac o fod yn agored ar draws y rhaglen. Soniodd lawer am ba mor brin ac ysbrydoledig oedd gweld ystod mor eang o safbwyntiau – o ymgyrchwyr ieuenctid a llunwyr polisi i academyddion a threfnwyr cymunedol – yn dod at ei gilydd o dan yr un to.

Wrth siarad ar ôl y digwyddiad, disgrifiodd Dr Luci Attala, Dirprwy Gyfarwyddwr Gweithredol BRIDGES, ei fod yn foment nodedig i’r glymblaid:

“Ar adeg o aflonyddwch byd-eang dwfn, fe wnaethon ni adeiladu pontydd rhwng cenedlaethau, disgyblaethau a diwylliannau,” meddai. “Mae’r digwyddiad hwn yn nodi ennyd pwerus o adfyfyrio ac ymrwymiad a rennir i fyd lle mae tosturi, doethineb ac arweinyddiaeth sy’n meddwl am y dyfodol yn arwain ein dewisiadau.

Roedd llwyddiant Bridging Futures yn amlwg nid yn unig yn y cynulleidfaoedd enfawr a’r cyfranogiad brwdfrydig, ond hefyd yn y sgyrsiau tawel, cyfeillgarwch a adnewyddwyd a chydweithrediadau a ddaeth i’r amlwg a barhaodd ymhell ar ôl i’r rhaglen ffurfiol ddod i ben.

Wrth i’r adfyfyrdodau olaf gael eu rhannu a ffarweliodd pawb â’i gilydd, roedd ymdeimlad clir mai dim ond y dechrau oedd hyn. Gosododd y digwyddiad sylfeini pwysig ar gyfer gwaith a phartneriaeth barhaus yn y dyfodol, gan sicrhau y bydd y cysylltiadau a ffurfiwyd yn Abertawe yn parhau i ysbrydoli newid ymhell y tu hwnt i Gymru.”

Gwybodaeth Bellach

Arwel Lloyd

Prif Swyddog Cyfathrebu a Chysylltiadau Cyhoeddus     
Cyfathrebu Corfforaethol a Chysylltiadau Cyhoeddus     
E-bost: arwel.lloyd@pcydds.ac.uk  
���ô��:&�Բ�����;07384&�Բ�����;467076