���Ҵ�ý

Mae Prifysgol Cymru Y Drindod Dewi Sant  (PCYDDS) yn falch i ddathlu llwyddiant Patricia Mathias-Lloyd, Rheolwr Datblygu Addysg seiliedig ar Waith yn Addysg a Gwella Iechyd Cymru (AaGIC), a raddiodd yn ddiweddar gydag MA mewn Arfer Proffesiynol. Dychwelodd Patricia i astudio academaidd ar ôl dros ddegawd, gan ddefnyddio’r rhaglen Fframwaith Arfer Proffesiynol (FfAP) i adfyfyrio ar ei phrofiad proffesiynol helaeth, cryfhau ei sgiliau arwain, a chymryd y cam nesaf yn ei gyrfa mewn addysg gofal iechyd.

Dewisodd Patricia yr MA mewn Arfer Proffesiynol oherwydd ei strwythur dysgu hyblyg, seiliedig ar waith. Am ei bod yn gobeithio camu i rôl rheoli uwch, gwelodd y byddai’r rhaglen yn alinio’n berffaith â’i hanghenion o ran datblygiad proffesiynol a chynllunio dilyniant. Nododd Patricia hefyd ei bod:

 “am fod yn fodel rôl i fy nhîm a dysgwyr i’w cefnogi gyda’u datblygiad.”

Trobwynt allweddol yn nhaith Patricia oedd ei phenderfyniad i hawlio credyd ar gyfer dysgu drwy brofiad, proses â’i galluogodd i adfyfyrio ar ddegawd o ddatblygiad proffesiynol a chyraeddiadau nad oeddynt wedi’u cydnabod o’r blaen. Ychwanega:

 “Roedd hawlio credyd ar gyfer dysgu drwy brofiad yn allweddol i gyflawni’r dyfarniad hwn. Roedd gallu gweld pa mor bell roeddwn wedi dod ar ôl ymchwilio’n feirniadol i’r hyn roeddwn wedi’i ddysgu, a sut, yn agoriad llygad. Roeddwn wedi gweithio ar ddarnau sylweddol o waith yn lleol ac yn genedlaethol ac maent i gyd wedi cyfrannu at fy natblygiad. Dim ond ers ymgymryd â’r modwl hwn rydw i wedi sylwi pa mor arwyddocaol maen nhw wedi bod.”

Nododd Sarah Loxdale, Arweinydd Modwl ar gyfer Cydnabod ac Achredu Dysgu: 
“Mae taith Patricia yn enghraifft bwerus o sut mae cydnabod a gwerthfawrogi dysgu drwy brofiad nid yn unig yn gallu trawsnewid cyrhaeddiad academaidd, ond hefyd hunanhyder a hunaniaeth broffesiynol. Ei gallu i adfyfyrio’n feirniadol ar ei harfer a throsi hynny’n gredyd academaidd ystyrlon yw’r union beth y cynlluniwyd y modwl hwn i’w gefnogi.”

Mae astudiaethau Patricia wedi cael effaith ddofn ar ei hyder a’i galluoedd proffesiynol. Ers dechrau’r cwrs, mae hi wedi cyflwyno mewn cynadleddau, cysylltu ag uwch reolwyr, a symud ymlaen o reoli un aelod o’r tîm i arwain tîm o un ar bymtheg. Bellach, yn ei rôl genedlaethol gyda AaGIC, mae hi’n datblygu a chefnogi rhaglenni addysg achrededig a heb achrediad sy’n dylanwadu ar y gweithlu gofal iechyd ledled Cymru.

Mae Patricia’n dweud bod y profiad wedi bod yn drawsnewidiol. 

 “Roedd cyflawni’r MA gydag anrhydedd yn brofiad anhygoel – gwnes i byth feddwl y buaswn i’n cyflawni hyn. Gwnaeth y cwrs fy helpu i sylweddoli arwyddocâd yr hyn roeddwn i wedi’i gyflawni – ac fe roddodd yr hyder a’r gred i fi y gallwn gymryd y cam nesaf yn fy ngyrfa.”

Gwnaeth natur adfyfyriol y cwrs hefyd trawsnewid ymagwedd Patricia at arweinyddiaeth.

 “Rwy’n teimlo fy mod wedi dod yn rheolwr mwy adfyfyriol ac rwy’n cymryd yr amser i adnabod sgiliau a galluoedd pobl eraill. Gallaf adnabod y dysgu drwy brofiad mae fy nhîm wedi’i ennill ac rydyn ni’n trafod hyn mewn sesiynau un i un a chyfarfodydd tîm. Mae hyn yn galluogi trafodaeth a hwyluso unigolion i weld eu bod yn dysgu a datblygu er nad ydynt yn sylweddoli hynny, ac mae rhoi’r amser iddynt allu ei wneud yn allweddol i mi.” 

Dywedodd Lowri Harris, Rheolwr Rhaglen ar gyfer y Fframwaith Arfer Proffesiynol: 

“Mae Patricia wedi dangos holl bwrpas y Fframwaith Arfer Proffesiynol; sef grymuso ymarferwyr proffesiynol i ddod â’u dysgu yn y gweithle’n fyw trwy astudio academaidd. Mae ei hymrwymiad a thwf trwy gydol y rhaglen wedi dangos sut y gall dysgu adfyfyriol, seiliedig ar waith gyfoethogi arweinyddiaeth a dylanwadu ar newid ar draws sectorau.”

Trwy gydol ei hamser yn PCYDDS, teimlodd Patricia ei bod wedi’i chefnogi’n llawn – yn arbennig yn ystod heriau’r pandemig byd-eang.

 “Roedd y tîm yn wych. Gwnaethant fy helpu i gadw ar y trywydd iawn a bodloni terfynau amser yn ystod cyfnod o newid enfawr ym maes addysg a hyfforddiant. Heb eu cefnogaeth, efallai na fuaswn wedi cwblhau’r rhaglen.

 “Trwy gydol pob modwl roedd y tiwtoriaid yn gefnogol iawn a chefais fy annog i barhau â’m hastudiaethau. Er nad oeddem yn gallu ymgymryd â’r rhaglen wyneb yn wyneb, rwy’n teimlo i mi sefydlu patrwm yn fuan lle’r oeddwn yn cydbwyso gwaith ac astudiaethau ac yn gwneud cynnydd. Mae’r wybodaeth a’r profiad rwyf wedi’u hennill yn ystod y rhaglen wedi cyfoethogi fy arfer a datblygiad proffesiynol. Bellach, rwy’n gweithio mewn rôl strategol ac i sefydliad sy’n cefnogi datblygiad addysg yn genedlaethol.”

Mae Patricia’n argymell y broses o hawlio dysgu drwy brofiad yn gryf, gan nodi:

 “Dydych chi ddim yn sylweddoli’r hyn rydych wedi’i ddysgu nes i chi gymryd yr amser i adfyfyrio. Mae’n broses addysgiadol tu hwnt.”

Am fwy o wybodaeth am y rhaglen Fframwaith Arfer Proffesiynol, ewch i: Fframwaith Arfer Proffesiynol | Prifysgol Cymru Y Drindod Dewi Sant

Gwybodaeth Bellach

Lowri Thomas

Prif Swyddog Cyfathrebu a Chysylltiadau Cyhoeddus      
Cyfathrebu Corfforaethol a Chysylltiadau Cyhoeddus      
E-bost: lowri.thomas@pcydds.ac.uk      
���ô��:&�Բ�����;07449&�Բ�����;998476