���Ҵ�ý

Mae murlun newydd bywiog gan un o fyfyrwyr BA Darlunio Coleg Celf Abertawe PCYDDS, Nancy Akuffobea, wedi’i ddadorchuddio yng nghanol y ddinas y tu allan i Adeilad Dinefwr y Brifysgol, gan ddod â lliw beiddgar a chyfoeth diwylliannol i ofod cyhoeddus a nodi carreg filltir bwysig mewn taith greadigol hynod bersonol a phwerus.

Ganed Nancy, sylfaenydd Oriel Nancy, yn Ghana a’i magu rhwng Gorllewin Affrica, Sisili, a De Cymru. Mae ei murlun, a ddewiswyd yn furlun swyddogol PCYDDS 2025/2026, yn dathlu nid yn unig ei threftadaeth amrywiol ond hefyd y gwytnwch a’r creadigrwydd sydd wedi llunio ei llwybr yn ddarlunydd a storïwr.

“Doeddwn i erioed wedi meddwl y byddwn i’n cyrraedd y pwynt hwn,” meddai Nancy. “Mae’r murlun hwn yn golygu popeth i mi. Mae’n brawf bod gwaith caled, aros yn driw i chi’ch hun, a pheidio byth â rhoi’r gorau iddi, hyd yn oed ar yr adegau tywyllaf, yn gallu mynd â chi ymhellach nag yr oeddech chi’n ei ddychmygu.”

Yn 2019, symudodd Nancy i Gymru, newid llethol a adawodd ei ôl ar  ei bywyd. Ar ôl cyrraedd y Cymoedd gyda Saesneg cyfyngedig, cafodd ei bwrw i amgylchedd hollol newydd. Er gwaethaf yr heriau o addasu i iaith a diwylliant newydd, cofleidiodd Nancy y cyfle i dyfu. “Ar y dechrau, doeddwn i ddim yn gallu deall llawer, roedd hi’n teimlo fel bod pawb yn siarad yn rhy gyflym. Ond mae caredigrwydd pobl, harddwch natur, a thawelwch y Cymoedd wedi fy helpu i gadw’n bositif,” meddai. Yn ystod y cyfnod hwn y dechreuais i werthfawrogi ymwybyddiaeth ofalgar yn iawn, manylion bach bywyd bob dydd, a gwerth creadigrwydd yn fath o fynegiant a hunan-ddarganfod.

Yr hyn a ddenodd Nancy at Brifysgol Cymru Y Drindod Dewi Sant oedd ei henw da am feithrin creadigrwydd a chynnig cysylltiadau cryf â’r diwydiant. Ar ôl ymchwilio i brifysgolion a chwblhau ei hastudiaethau coleg mewn Celf a Dylunio, roedd Coleg Celf Abertawe PCYDDS yn sefyll allan. 

“Roedd e’n teimlo fel y lle iawn i dyfu fel artist ac fel person,” meddai. “Roedd y tiwtoriaid mor angerddol, ac roeddwn i’n gwybod y byddwn i’n cael fy nghefnogi i ddatblygu fy llais fy hun.” Trwy brosiectau ymarferol, dysgu cydweithredol, a diwylliant o anogaeth, dechreuodd arddull ddarlunio nodedig Nancy ffynnu - wedi’i nodi gan liw llachar, cyfansoddiadau beiddgar, ac adrodd straeon trwy ddelweddau.

Un prosiect allweddol a’i gwthiodd yn broffesiynol oedd ei chydweithrediad ag Oasis, sefydliad elusennol sydd wedi’i leoli yng Nghaerdydd ac sy’n cynorthwyo ceiswyr lloches a ffoaduriaid. Yn rhan o’i phortffolio graddio trydedd flwyddyn, comisiynwyd Nancy i greu logo ar gyfer band a grëwyd gan aelodau o’r gymuned hon. Mae’r prosiect nid yn unig yn caniatáu iddi gyfuno ei chariad at gerddoriaeth Afrobeat â dylunio, ond mae hefyd wedi dysgu iddi sut i weithio gyda chleientiaid go iawn, llywio rhwystrau cyfathrebu, a mireinio ei sgiliau mewn ymchwil a brandio. 

“Roedd hi’n her, ond yn un a wnaeth i mi dyfu,” meddai. “Roeddwn i am i’r logo adlewyrchu enaid y band a’r diwylliant y mae’n ei ddathlu.”

Mae amser Nancy yn PCYDDS wedi bod yn llawn cerrig milltir creadigol, o arddangos ei gwaith yn Piccadilly Circus Llundain ar gyfer Diwrnod Cofio’r Holocost, i gael gwahoddiad i De Parti’r Coroni lle cyfarfu â Dug Caerloyw. Mae ei chyfranogiad yn Abertawe Agored 2024 y Glynn Vivian  a rhyddhau ei llyfrau lluniau i blant, “The Journey of Russell and Aurora” a “Journey of Colour” yn dangos eto ei hymrwymiad i adrodd straeon, hunaniaeth ac empathi gweledol.

Mae’r murlun sydd newydd ei ddadorchuddio, ac sy’n gyfoethog o liw a symbolaeth, yn cynrychioli hyn i gyd: taith o Ghana i Sisili i Gymru, wedi’i hadrodd trwy baletau bywiog a symudiadau brwsh gweadog. Mae’n fwy na chelf - mae’n ddathliad o dreftadaeth, gwytnwch a buddugoliaeth greadigol.

Wrth edrych ymlaen, mae Nancy yn canolbwyntio ar ehangu ei siop ar-lein, trwyddedu ei gwaith celf, a chydweithio â gweithwyr creadigol proffesiynol. “Rydw i am barhau i dyfu, parhau i ddysgu, a pharhau i rannu llawenydd trwy gelf,” meddai. “Os gall fy ngwaith oleuo diwrnod rhywun, rydw i wedi gwneud fy ngwaith.”

Gwybodaeth Bellach

Rebecca Davies

Swyddog Gweithredol Cysylltiadau â’r Wasg a’r Cyfryngau     
Cyfathrebu Corfforaethol a Chysylltiadau Cyhoeddus     
E-bost: rebecca.davies@pcydds.ac.uk     
���ô��:&�Բ�����;07384&�Բ�����;467071