Grymuso gan Addysg: Reia Sigrist yn symud ymlaen i MSc mewn Seicoleg Gymhwysol yn PCYDDS
I Reia Sigrist, nid oedd ymuno â Phrifysgol Cymru Y Drindod Dewi Sant yn ymwneud ag ennill gradd yn unig, roedd yn ymwneud â dod o hyd i le i dyfu, cysylltu a ffynnu. Yn fyfyrwraig aeddfed a mam i ddau o blant, daeth Reia â phrofiad bywyd unigryw i’w hastudiaethau ac yn PCYDDS daeth o hyd i’r gefnogaeth a’r anogaeth oedd eu hangen arni i lwyddo.
Mae stori Reia yn ddathliad o ddyfalbarhad, cymuned, a grym trawsnewidiol addysg.
Cafodd llwybr Reia i PCYDDS ei yrru gan chwilfrydedd dwfn am ymddygiad dynol ac awydd i gael effaith gadarnhaol ar iechyd meddwl. Wrth chwilio am brifysgol sy’n gwerthfawrogi cysylltiad personol, trylwyredd academaidd, a dysgu cymhwysol, daeth o hyd i’r lle delfrydol yn PCYDDS.
“Roeddwn i’n chwilio am amgylchedd cefnogol a chanddo ddosbarthiadau llai a gofal bugeiliol cryf,” meddai Reia, sy’n byw yn Abertawe. “Roedd PCYDDS yn sefyll allan am ei hawyrgylch croesawgar a’i ffocws ar seicoleg ymarferol, gymhwysol. Rydw i wedi tyfu’n academaidd ac yn bersonol yn ystod fy amser yma.”
Wedi’i denu at seicoleg am ei phŵer i ddeall a gwella bywydau pobl, ymgollodd Reia mewn astudiaethau sy’n cwmpasu iechyd meddwl, seicoleg wybyddol, a methodoleg ymchwil. Un o uchafbwyntiau allweddol ei chwrs oedd ei thraethawd hir, a oedd yn archwilio’r berthynas rhwng nodweddion personoliaeth ac ymddygiad yn y gweithle, prosiect ymchwil annibynnol a hogodd ei sgiliau meddwl dadansoddol a beirniadol.
Enillodd Reia hefyd brofiad ymarferol trwy waith gwirfoddol mewn ysgol gynradd leol, lle gwelodd ymyriadau iechyd meddwl cynnar a rôl hanfodol ysgolion mewn lles emosiynol. Helpodd y profiadau hyn i lunio ei diddordebau a’i nodau hirdymor.
“Rwyf am weithio mewn rôl sy’n helpu pobl i oresgyn heriau seicolegol a gwella ansawdd eu bywyd,” esboniodd. “Helpodd y cwrs fi i fireinio’r uchelgeisiau hynny a rhoddodd y sgiliau i mi eu dilyn.”
Nid oedd amser Reia yn PCYDDS yn ddi-her. Llywiodd ofynion addysg uwch wrth fagu dau blentyn ifanc, gan gynnwys rhoi genedigaeth i’w hail blentyn yn ystod ei hail flwyddyn. Trwy reoli amser yn gadarn, dyfalbarhad, a chefnogaeth academaidd a llesiant y brifysgol, ymrwymodd i’w hastudiaethau a chyflawni ei nodau.
“Doedd hi ddim yn hawdd, ond dysgais i flaenoriaethu, cadw’n drefnus, a phwyso ar y gefnogaeth oedd ar gael, yn enwedig gan fy narlithwyr a’m cyd-ddisgyblion. Roedd yr ymdeimlad hwnnw o gymuned wedi gwneud gwahaniaeth mawr.”
Nawr, a hithau’n paratoi i barhau â’i thaith academaidd gydag MSc mewn Seicoleg Gymhwysol yn PCYDDS, mae Reia yn gyffrous i ymchwilio’n ddyfnach i seiberseicoleg, maes sy’n archwilio effaith amgylcheddau digidol ar ymddygiad dynol ac iechyd meddwl.
“Trwy gydol fy astudiaethau israddedig, darganfûm angerdd am sut mae technoleg yn croestorri â seicoleg. Rwy’n awyddus i archwilio hynny ymhellach a dod o hyd i ffyrdd i’w gymhwyso mewn ffyrdd ystyrlon, sy’n seiliedig ar dystiolaeth.”
Mae Reia yn argymell y cwrs seicoleg i ddarpar fyfyrwyr yn gryf:
“Mae’r cwrs yn cynnig sylfaen academaidd gadarn ac yn annog twf personol. Nid rhif yn unig ydych chi - rydych chi’n rhan o gymuned lle mae eich llais yn bwysig.”
Gwybodaeth Bellach
Arwel Lloyd
Prif Swyddog Cyfathrebu a Chysylltiadau Cyhoeddus
Cyfathrebu Corfforaethol a Chysylltiadau Cyhoeddus
E-bost: arwel.lloyd@pcydds.ac.uk
ô:&Բ;07384&Բ;467076