Myfyrwraig o Bort Talbot, Chloe Fowler, yn cael ei hanrhydeddu â Gwobr Celfyddydau Perfformio yn ystod seremoni raddio yn y Drindod Dewi Sant
Mae Chloe Fowler, perfformwraig ifanc dalentog o Bort Talbot, wedi cael ei henwi’n gyd-enillydd Gwobr Celfyddydau Perfformio (cyfrwng Saesneg) am Ragoriaeth mewn Gwaith a Chydweithio yn ystod seremoni raddio heddiw ym Mhrifysgol Cymru Y Drindod Dewi Sant (PCYDDS).
Cafodd y myfyrwraig 21 oed, a astudiodd ar gampws Caerfyrddin, ei dathlu nid yn unig am ei chyflawniadau academaidd a chreadigol ond hefyd am yr ysbryd cydweithredol a’r angerdd a ddaeth â hi i bob agwedd ar ei hastudiaethau.
Wrth fyfyrio ar ei hamser yn y brifysgol, dywedodd Chloe:
“Doeddwn i erioed wedi bod yn hoff o actio a theatr pan oeddwn i’n blentyn, ond datblygais gariad ato wrth i mi dyfu i fyny trwy wylio llwyth o ffilmiau a gweld cymaint o theatr ag y gallwn. Pan ddes i ar draws y cwrs yng Nghaerfyrddin, roedd yn teimlo’n iawn ac roedd yn agos at adref ond yn dal i roi’r annibyniaeth roeddwn i ei eisiau i mi.”
Mae ei thaith trwy’r radd BA (Anrh) Actio wedi’i nodi gan dwf personol, cydweithrediadau cyffrous, a chyfleoedd nad oedd hi byth yn eu disgwyl, meddai.
“Fe wnes i fynd ati gyda meddwl agored, a thrwy hynny, darganfyddais yr hyn roeddwn i wir yn ei garu,” eglurodd. “O wythnos cydweithio yn yr ail flwyddyn, lle gwnaethon ni greu perfformiad o’r dechrau, i ddod yn gwmni theatr yn y drydedd flwyddyn ochr yn ochr â’r cwrs dylunio setiau - roedd yr eiliadau hynny’n bythgofiadwy. Rydych chi’n cysylltu â chymaint o bobl ac yn cael y cyfle i fod yn greadigol mewn gwirionedd.”
Un uchafbwynt yn arbennig a safodd allan i Chloe:
“Trwy’r cwrs, cefais y cyfle i berfformio yng Ngardd Fotaneg Genedlaethol Cymru mewn prosiect theatr awyr agored gyda Walk the Plank. Roedd yn brofiad anhygoel, rhywbeth na ddychmygais erioed y byddwn i’n ei wneud. Dysgodd gymaint i mi am berfformio mewn gwahanol leoedd a pha mor amlbwrpas y gallwch chi fod.”
Canmolodd Lynne Seymour, Cyfarwyddwr Academaidd y diwydiannau Dylunio a Pherfformio, ymrwymiad, haelioni a thwf Chloe drwy gydol ei hastudiaethau:
“Mae Chloe wedi bod yn bleser i’w dysgu. Mae ei phenderfyniad, ei gallu i gydweithio, a’i chwilfrydedd fel person creadigol i gyd wedi disgleirio drwy gydol y cwrs. Mae hi’n mynd ati i bob her gyda meddylgarwch ac awydd gwirioneddol i ddysgu. Mae Chloe yn artist sy’n gwrando, yn myfyrio ac yn arwain trwy esiampl, ac rydym mor falch o’i gweld hi’n cael ei chydnabod gyda’r wobr hon.”
Er gwaethaf y ganmoliaeth, mae Chloe yn gyflym i dynnu sylw at yr heriau a wynebodd ar hyd y ffordd.
“Fel llawer o fyfyrwyr, cefais fy siâr o heriau - o iechyd meddwl i addasu i le newydd a chydbwyso’r cyfan. Ond gwnaeth y gefnogaeth gan fy ffrindiau a’r tiwtoriaid anhygoel wahaniaeth mawr. Roeddent bob amser yno i gynnig cyngor neu wrando, ac ni fyddaf byth yn anghofio hynny.”
Mae’r wobr yn cydnabod cyfraniad rhagorol Chloe i’r cwrs a’i gallu i gydweithio, arwain a chefnogi eraill - rhinweddau y mae wedi’u cymryd gyda hi wrth iddi gamu i’r diwydiannau creadigol.
“Helpodd y cwrs hwn fi i ddeall pa fath o berson creadigol yr wyf am fod ac yn fwy na hynny, fe helpodd fi i dyfu i fod y math o berson yr wyf am fod. Rwyf wedi dod yn fwy hyderus, gwydn, tosturiol a charedig.”
O ran beth sydd nesaf? Mae Chloe yn cadw ei hopsiynau ar agor, gan gymryd amser i archwilio, myfyrio ac aros yn greadigol.
“Ar hyn o bryd, rwy’n gweithio ar fy CV, rhwydweithio, a chadw fy hun yn greadigol trwy ysgrifennu, rhywwbeth rwy’n ei garu. Rwy’n chwilio am gyfleoedd ac yn barod i’w cymryd wrth iddynt ddod.”
Mae Prifysgol Cymru Y Drindod Dewi Sant yn llongyfarch Chloe ar y gydnabyddiaeth haeddiannol hon ac yn dymuno pob llwyddiant iddi yn yr hyn sy’n addo bod yn ddyfodol disglair a chyffrous.
Gwybodaeth Bellach
Arwel Lloyd
Prif Swyddog Cyfathrebu a Chysylltiadau Cyhoeddus
Cyfathrebu Corfforaethol a Chysylltiadau Cyhoeddus
E-bost: arwel.lloyd@pcydds.ac.uk
ô:&Բ;07384&Բ;467076