O Reolwr Cyfleusterau i Seicotherapydd y Dyfodol: Myfyrwraig o’r Drindod Dewi Sant, Shaheena Kenyon, yn Cychwyn ar Daith sy’n Newid Bywyd
Mae Prifysgol Cymru Y Drindod Dewi Sant (PCYD) yn falch o roi sylw i daith ysbrydoledig Shaheena Kenyon, a raddiodd yn ddiweddar o’r rhaglen BSc Seicoleg a Chwnsela, y mae ei phrofiadau personol, ei gwydnwch, a’i hangerdd dros lesiant emosiynol wedi’i rhoi ar y llwybr i ddod yn seicotherapydd.
Gan weithio fel Rheolwr Cyfleusterau yn flaenorol, cymerodd bywyd Shaheena dro trawsnewidiol yn dilyn heriau personol, y profiad o ddod yn rhiant, a’i thaith ei hun drwy gwnsela. “Deffrodd y profiadau hyn rywbeth ynof,” meddai. “Rhoddasant werthfawrogiad dyfnach i mi o lesiant emosiynol, nid yn unig fy un i, ond eraill hefyd. Dyna a’m harweiniodd i archwilio byd seicoleg a chwnsela.”
Dewisodd Shaheena PCYDDS am ei chyfuniad unigryw o drylwyredd academaidd a pherthnasedd yn y byd go iawn. “Elfen ymarferol y cwrs ochr yn ochr â damcaniaeth seicolegol gref oedd yn union yr hyn yr oeddwn yn chwilio amdano,” eglurodd. “Roedd yn canolbwyntio ar bobl, wedi’i strwythuro’n feddylgar, ac wedi’i seilio ar ymarfer therapiwtig go iawn.”
Yn ddysgwraig sy’n dychwelyd ac yn rhiant sengl, wynebodd Shaheena sawl her ar hyd y ffordd, gan gynnwys cydbwyso astudiaethau â rhianta a dod i ddeall ei niwroamrywiaeth ei hun. Gyda chefnogaeth y brifysgol yn enwedig trwy strategaethau dysgu wedi’u teilwra ac amgylchedd gwirioneddol gynhwysol, llwyddodd i gofleidio ei chryfderau a chwblhau ei gradd yn llwyddiannus.
“Roedd y gwasanaethau cymorth i fyfyrwyr yn anhygoel. Dysgais ofyn am help, rheoli fy nghyflymder, a chofleidio pwy ydw i yn hytrach na cheisio ei guddio.”
Un o agweddau mwyaf effeithiol ei hastudiaethau oedd ei phrosiect traethawd hir, a archwiliodd effeithiau gwaith anadlu dan arweiniad ar bryder cyflwr, pwnc sy’n agos at ei chalon. “Roedd yn gyfle i gyfuno damcaniaeth â gwaith ymarferol, yn seiliedig ar dystiolaeth. Roeddwn i eisiau iddo fod yn ddefnyddiol, nid yn unig yn gadarn yn academaidd, ond yn rhywbeth a allai helpu pobl yn wirioneddol,” meddai.
Wrth fyfyrio ar ei hamser yn Y Drindod Dewi Sant, mae Shaheena yn tynnu sylw at y twf academaidd a’r trawsnewidiad personol y mae wedi’i brofi. “Rhoddodd y daith gyfeillgarwch gydol oes, hyder newydd, a synnwyr dyfnach o bwrpas i mi. Rwy’n fwy hunanymwybodol, yn fwy tosturiol, ac wedi’m cyfarparu â’r sgiliau sydd eu hangen arnaf i wneud gwahaniaeth.”
Gan ei bod bellach yn bwriadu dilyn astudiaeth ôl-raddedig mewn seicotherapi, mae Shaheena yn gyffrous am y bennod nesaf. “Rwyf am barhau i gyfuno profiad byw, empathi, ac ymarfer sy’n seiliedig ar dystiolaeth. Mae’r gwaith hwn yn bwysig i mi, ac rwyf wedi ymrwymo i helpu eraill i deimlo eu bod yn cael eu gweld a’u cefnogi.”
Mae Shaheena yn argymell y cwrs yn gryf i eraill: “P’un a ydych chi am ddod yn gwnselydd neu weithio mewn unrhyw broffesiwn cymorth, mae’r cwrs hwn yn cynnig cymaint mwy na chymhwyster yn unig, mae’n cynnig twf personol, cysylltiad, a sylfaen ar gyfer gwaith ystyrlon.”
Gwybodaeth Bellach
Arwel Lloyd
Prif Swyddog Cyfathrebu a Chysylltiadau Cyhoeddus
Cyfathrebu Corfforaethol a Chysylltiadau Cyhoeddus
E-bost: arwel.lloyd@pcydds.ac.uk
ô:&Բ;07384&Բ;467076