���Ҵ�ý

Bu Dr Charles Okeyia, rheolwr telathrebu sydd bellach wedi graddio o’r cwrs Doethur mewn Gweinyddiaeth Busnes (DBA) ar gampws Llundain Prifysgol Cymru Y Drindod Dewi Sant, yn dathlu ei gyrhaeddiad academaidd heddiw, gan nodi carreg filltir arwyddocaol yn ei ymgais i bontio arbenigedd yn y diwydiant ac ymchwil academaidd cymhwysol.  

Gyda chefndir proffesiynol mewn rheoli asedau telathrebu ac awch am ddatrys problemau strategol, dewisodd Charles raglen DBA PCYDDS sy’n canolbwyntio ar arfer i ddwysáu ei effaith mewn arweinyddiaeth busnes ac ysgolheictod academaidd fel ei gilydd.

Mae gan Dr Okeyia flynyddoedd o brofiad ym maes rheoli asedau a gweithrediadau telathrebu, a’i awydd i gysylltu ymchwil ag arfer yn y byd go iawn a’i arweiniodd at PCYDDS. “Roedd strwythur y rhaglen DBA, sy’n cyfuno ymchwil cymhwysol â fframweithiau damcaniaethol wedi’u teilwra i heriau’r gweithle, yn cyd-fynd yn berffaith â’m nodau proffesiynol,” meddai. 

Pan ofynnwyd iddo am ei gymhelliad i ddilyn y cwrs, pwysleisiodd Dr Okeyia ei uchelgais i ennill sgiliau ymchwil uwch, i ddyfnhau ei sgiliau meddwl yn feirniadol, ac i ddatblygu agwedd fwy strategol at reoli ac arwain. “Mae’r daith hon wedi fy helpu i ddatblygu’r wybodaeth a’r hyder i ymgymryd â chydweithio ysgolheigaidd ystyrlon ac i arwain â phwrpas,” ychwanegodd. 

Un o uchafbwyntiau penodol y cwrs i Dr Okeyia oedd y gallu i gymhwyso damcaniaethau academaidd uwch i brosiectau yn y gweithle, gan helpu i ddatrys problemau sefydliadol. Roedd ei ymchwil arbenigol yn canolbwyntio ar reoli cynnal a chadw asedau; maes sydd yn ei farn ef yn hanfodol ar gyfer effeithlonrwydd gweithredol yn y sector telathrebu. “Roedd datblygu methodoleg a chynllun ymchwil cadarn i ymchwilio i’r maes hwn yn heriol a gwerth chweil,” meddai.

Un o’r heriau anoddaf yn ystod ei astudiaethau oedd cael gafael ar gyfranogwyr ymchwil a sicrhau ansawdd data yn ystod y cyfnod casglu. “Roedd angen cynllunio gofalus, dyfalbarhad, a’r gallu i addasu, ond fe wnaeth goresgyn hynny ddysgu llawer i mi am foeseg ymchwil a chyfyngiadau ymarferol,” meddai.

Mae’n rhoi’r clod mwyaf i’r rhaglen DBA ac yn ei hargymell i weithwyr proffesiynol sy’n ceisio datblygu eu harfer trwy ymchwil. “Nid yw’n ymwneud â damcaniaeth yn unig; mae’n ymwneud â thrawsnewid sut rydym yn arwain ac yn datrys problemau yn y gweithle.” 

Yn broffesiynol ac yn bersonol, mae’r cwrs eisoes wedi cael effaith sylweddol. “Mae’r sgiliau rydw i wedi’u hennill, meddwl yn strategol, arweinyddiaeth, a datrys problemau, yn adnoddau rwy’n eu defnyddio’n ddyddiol,” meddai. Wrth edrych ymlaen, mae Charles yn bwriadu parhau i gyfrannu at wybodaeth academaidd ac arfer proffesiynol trwy gyhoeddi erthyglau ymchwil sy’n archwilio rheoli cynnal a chadw asedau mewn mwy o fanylder.

Gwybodaeth Bellach

Rebecca Davies

Swyddog Gweithredol Cysylltiadau â’r Wasg a’r Cyfryngau     
Cyfathrebu Corfforaethol a Chysylltiadau Cyhoeddus     
E-bost: rebecca.davies@pcydds.ac.uk     
���ô��:&�Բ�����;07384&�Բ�����;467071