Taith o gryfder, cymorth a llwyddiant yn PCYDDS
Wrth i’r flwyddyn academaidd ddod i ben, mae Prifysgol Cymru Y Drindod Dewi Sant (PCYDDS) yn falch o ddathlu cyflawniadau ei myfyrwyr graddedig - yn eu plith, y fyfyrwraig Troseddeg a Phlismona Sadie Mason, y mae ei thaith ryfeddol yn ymgorffori ysbryd penderfyniad, gwytnwch a chymuned sy’n diffinio profiad PCYDDS.
Wrth fyfyrio ar ei hamser yn y brifysgol, mae Sadie yn siarad gyda balchder a diolchgarwch aruthrol. Iddi hi, nid rhesymau academaidd yn unig oedd wrth wraidd y dewis i astudio yn PCYDDS, roedd yn benderfyniad hynod bersonol.
“O’m hymweliad cyntaf, roedd PCYDDS yn teimlo’n wahanol,” meddai. “Roedd cynhesrwydd i’r campws, teimlad bod hwn yn fan lle na fyddwn i ond yn fyfyriwr arall.”
Denwyd Sadie gan feintiau dosbarthiadau llai’r brifysgol a’i phwyslais ar gymorth unigol, a daeth hi o hyd i amgylchedd meithrin academaidd lle gallai ffynnu’n wirioneddol. Wrth astudio Troseddeg a Phlismona, elwodd hi o gymorth un-i-un, mentora, a darlithwyr a oedd yn ei hadnabod hi wrth ei henw.
Fodd bynnag, doedd ei thaith ddim yn un hawdd. Yn ystod ei hail flwyddyn, darganfu Sadie ei bod hi’n disgwyl ei mab, eiliad sy’n newid bywyd a ddaeth â rhwystrau ac ansicrwydd newydd.
“Nid camp fach oedd parhau â’m hastudiaethau wrth baratoi i ddod yn rhiant,” meddai. “Roedd cyfnodau o amheuaeth pan fyddwn i’n cwestiynu a allwn i reoli’r cyfan, aseiniadau, dyddiadau cau, darlithoedd, a’r dreth emosiynol.”
Yn ystod y cyfnod hwn y gwnaeth y gymuned gefnogol yn PCYDDS wahaniaeth sylweddol. Trwy sgyrsiau tosturiol a chalondid cyson, rhoddodd ei darlithwyr nid yn unig gymorth academaidd ond hefyd sicrwydd emosiynol.
“Gwrandawon nhw arna i, fe’m calonogon nhw i ac atgoffon nhw fi i o’m potensial pan oeddwn i’n cael trafferth gweld hynny drosof fy hun,” meddai.
Gyda gwytnwch a phenderfyniad a chymorth cymuned y brifysgol, dyfalbarhaodd Sadie. Mae hi’n cydbwyso nosweithiau digwsg â dyddiadau cau traethodau, cyfrifoldebau rhianta â llymder academaidd, a bellach dyma hi’n graddio gyda gradd Anrhydedd Dosbarth Cyntaf mewn Troseddeg a Phlismona.
“Nid camp bersonol i mi yn unig yw hon,” ychwanegodd. “Mae’n dyst i’r staff anhygoel yn PCYDDS oedd yno i mi, bob cam o’r ffordd ac i’m mab. Heb yn wybod i mi, rhoddon nhw’r cymhelliant i mi barhau i wthio ymlaen.
“I unrhyw un sy’n ystyried ble i astudio, byddwn i’n dweud hyn: dewiswch rywle sy’n eich gweld chi fel person, nid dim ond myfyriwr. I mi, dyna oedd Prifysgol Cymru Y Drindod Dewi Sant.”
Gwybodaeth Bellach
Mared Anthony
Swyddog Cyfathrebu a Chysylltiadau Cyhoeddus: Cysylltiadau Cyn-fyfyrwyr
Cyfathrebu Corfforaethol a Chysylltiadau Cyhoeddus
E-bost: mared.anthony@pcydds.ac.uk
ąó´ÚĂ´˛Ô:&˛Ô˛ú˛ő±č;+447482256996