Dathlu llwyddiant achredu a dyfodol disglair i Waith Ieuenctid yn Y Drindod Dewi Sant
Mae Prifysgol Cymru Y Drindod Dewi Sant yn falch o ddathlu digwyddiad achredu Cymeradwyaeth ETS hynod lwyddiannus, a gynhaliwyd ar gampws Caerfyrddin yn ddiweddar.
Roedd y digwyddiad yn garreg filltir arwyddocaol i raglenni Gwaith Ieuenctid y sefydliad. Ymwelodd cynrychiolwyr o ETS Cymru â’r campws fel rhan o’r broses ail-gymeradwyo pum mlynedd, a drefnwyd yn dilyn proses ail-ddilysu llwyddiannus diweddar o’r rhaglenni Gwaith Ieuenctid. Yn ystod yr adolygiad trylwyr hwn, aseswyd y rhaglenni Gwaith Ieuenctid israddedig ac Ă´l-raddedig yn drylwyr a’u hail-gymeradwyo’n swyddogol.
Yn dilyn y broses hon, bydd y Brifysgol yn lansio fersiynau wedi’u hadfywio o’i chymwysterau Gwaith Ieuenctid o fis Medi 2025 o dan y teitlau newydd canlynol:
- Pobl Ifanc, Cymunedau a Gwaith Ieuenctid
- MA Pobl Ifanc, Cymunedau a Gwaith Ieuenctid – Llwybr Cymhwyso Cychwynnol
- Pobl Ifanc, Cymunedau a Gwaith Ieuenctid: Llwybr Ôl-gymhwyso – Llwybr Ôl-gymhwyso
Mae’r rhaglenni newydd hyn yn adlewyrchu ymrwymiad parhaus Prifysgol Cymru Y Drindod Dewi Sant i ragoriaeth, perthnasedd ac arloesedd mewn addysg Gwaith Ieuenctid. Fe’u datblygwyd trwy ymgynghori helaeth â rhanddeiliaid ar draws y maes gan gynnwys cyflogwyr, myfyrwyr, graddedigion a darparwyr lleoliadau, ac fe’u cynlluniwyd i ddiwallu anghenion esblygol y sector Gwaith Ieuenctid yng Nghymru a thu hwnt.
Dywedodd Natalie MacDonald, Cyfarwyddwr Academaidd Plentyndod, Ieuenctid ac Addysg:
“Mae’r teitlau a llwybrau cwricwlwm newydd hyn yn cynrychioli ymateb beiddgar a blaengar i anghenion newidiol pobl ifanc a’r proffesiwn Gwaith Ieuenctid. Maent yn adlewyrchu cenhadaeth y Brifysgol i ddarparu addysg effeithiol, sy’n canolbwyntio ar y gymuned ac sy’n cefnogi datblygiad ymarferwyr hyderus a medrus ledled Cymru a thu hwnt”.
Bydd y rhaglen BA yn cynnig yr hyblygrwydd mwyaf, gyda llwybrau astudio llawn amser a rhan-amser. I’r rhai sydd mewn cyflogaeth, mae llwybr rhan-amser gyda’r nos yn parhau i fod ar gael, gyda sesiynau wythnosol a gyflwynir yn bersonol ar gampws Caerfyrddin ac ar-lein trwy MS Teams, am yn ail wythnos, sy’n darparu opsiwn hygyrch i weithwyr proffesiynol sy’n gweithio.
Bydd y rhaglen MA hefyd ar gael yn llawn amser ac yn rhan amser, gydag opsiwn o ddilyn llwybr Ă´l-gymhwysol newydd sydd wedi’i gynllunio ar gyfer Gweithwyr Ieuenctid profiadol sydd eisoes wedi cymhwyso ond sy’n dymuno dilyn astudiaeth uwch. Mae’r llwybr newydd hwn yn ategu’r ddarpariaeth MA bresennol, a fydd yn parhau i gynnig cymhwyster proffesiynol Gwaith Ieuenctid i raddedigion o gefndiroedd academaidd eraill.
Mae addysg Gwaith Ieuenctid wedi bod yn gonglfaen i ddarpariaeth PCYDDS ers dros ddau ddegawd, gyda’r garfan gyntaf o fyfyrwyr Gwaith Ieuenctid yn dechrau eu hastudiaethau yn 2004. Mae’r Brifysgol yn falch o’i hanes cryf yn y maes ac o’r gymuned fywiog o fyfyrwyr, ymarferwyr a phartneriaid sy’n parhau i lunio a chefnogi ei rhaglenni.
Roedd ymweliad panel ETS Cymru yn cynnwys cyfres o ddigwyddiadau ymgysylltu ystyrlon, gan ddechrau gyda chyfarfodydd ag uwch staff y brifysgol ac ymestyn i arweinwyr rhaglenni, cyflogwyr, goruchwylwyr lleoliadau, mentoriaid dysgu, myfyrwyr presennol a graddedigion diweddar. Mae’r lefel uchel o gyfranogiad gan randdeiliaid yn tynnu sylw at y perthnasoedd cryf a’r ethos cydweithredol sydd wrth wraidd rhaglenni Gwaith Ieuenctid PCYDDS.
Dywedodd Angharad Lewis, Rheolwr Rhaglen Pobl Ifanc, Cymunedau a Gwaith Ieuenctid yn Y Drindod Dewi Sant:
“Roedd yn fraint llwyr fod yn rhan o ddigwyddiad Cymeradwyaeth ETS - diwrnod hynod gadarnhaol yn llawn brwdfrydedd ac anogaeth gan fyfyrwyr, graddedigion a rhanddeiliaid fel ei gilydd. Tynnodd yr awyrgylch ysbrydoledig sylw at yr ymrwymiad ar y cyd i hyrwyddo addysg Gwaith Ieuenctid yn Y Drindod Dewi Sant. Mae’r cam nesaf hwn yn gyfle cyffrous i adeiladu ar ein llwyddiannau a pharhau i rymuso myfyrwyr i wneud gwahaniaeth gwirioneddol a pharhaol mewn cymunedau ledled Cymru a thu hwnt”.
Mae’r canlyniad achredu llwyddiannus hwn yn nodi pennod newydd gyffrous i addysg Gwaith Ieuenctid yn Y Drindod Dewi Sant, gan atgyfnerthu rôl y Brifysgol fel darparwr blaenllaw o hyfforddiant Gwaith Ieuenctid proffesiynol yng Nghymru.
Gwybodaeth Bellach
Arwel Lloyd
Prif Swyddog Cyfathrebu a Chysylltiadau Cyhoeddus
Cyfathrebu Corfforaethol a Chysylltiadau Cyhoeddus
E-bost: arwel.lloyd@pcydds.ac.uk
ąó´ÚĂ´˛Ô:&˛Ô˛ú˛ő±č;07384&˛Ô˛ú˛ő±č;467076